ገርጂ ዐማኑኤል ኅብረት ቤተ ክርስቲያን በአዲስ አበባ አማኑኤል ስር በመሆን የተመሰረተች በገርጂ አካባቢ የምትገኝ አጥቢያ ናት። አጥቢያዋን ለመትከል በአዲስ አበባ አማኑኤል ከአስራ ሶስት አመታት በላይ በተለያዩ ዘርፎች በማገልገል የቆዩትና በጌታና በቤተክርስቲያን ጥሪ ምክንያት እራሳቸውን ለሙሉ ጊዜ አገልጋይነት በመስጠት እስከ አመራር ደረጃ በአጥቢያዋ ሲያገለግሉ የነበሩትን ወንድም ዘርይኹን ኀይለሚካኤልን (አሁን የአጥቢያዋ መጋቢ) እና የአዲስ አበባ አማኑኤል ምስረታ ጀምሮ የነበሩትን ባለቤታቸውን ወ/ሮ መቅደስ ኃ/መስቀል በ2006 ዓ.ም. በመላክ ለመትከል ተችሏል፡፡ መጋቢ ዘርይኹን ኀይለሚካኤል የሻሸመኔ አማኑኤል ፣ የመርካቶና አካባቢዋ አማኑኤል አጥቢያዎች የምስረታ ወቅቶች፣ በአዲስ አበባ አማኑኤል ደግሞ የመደራጀትና የመስፋፋት ዓመታት ላይ ነበሩ። መጋቢው ጌታ የሰጣቸውን ጸጋ እና እነዚህን በተግባር የታገዙ ልምዶችንና ተመክሮዎች እንዲሁም የገርጂ አካባቢ ከሚፈልገው ተጨባጭ ሁኔታ ጋር በማዛመዳቸው በገርጂ አካባቢ ይህችን አጥቢያ ለመትከል ተችሏል። የገርጂ አማኗኤል ከምስረታዋ ጀምሮ ለድርድር የማይቀርቡ ተግባራትን፣ የአገልግሎት ስልቶች እና ግልጽ ትኩረቶችን በመለየት ሁለት ጥንድ ቤተሰቦችን እና የእነርሱ የሆኑ ሁለት ህጻናትን እና ሁለት ታዳጊዎች በመያዝ መስከረም 17 ቀን 2006 ዓ.ም ነበር ተመሰረተች፡፡ አጥቢያዋ በገርጂ አካባቢ በሚገኝ ከኹለቱ ቤተሰቦች የአንዱ በሆነ ኮንደሚንየም ቤት ውስጥ መደበኛ የጸሎትና የቃል ጥናት ጊዜያት እንዲሁም የልጆች አገልግሎት በማድረግ አገልግሎቷን ጀመረች፡፡ በዚህም ሁኔታ ጥቂት ከቆየች በኃላ አገልግሎቱ እያደገ ከመምጣቱ ጋር ተያይዞ የተሻለ የማምለኪያ ስፍራ እንዲኖራት በማስፈለጉ በዚያው አካባቢ ሁለት ክፍል ቤት በመከራየት መደበኛ እና የልጆች አገልግሎቷን ቀጠለች፡፡ ይሁንና በእግዚአብሔር ጸጋ በመታገዝ የአባላት ቁጥር እየጨመረ በመምጣቱ የማምለኪያ ክፍሉ እየጠበበ መጣ። በመሆኑም በ2007 ዓ.ም ሌላ የማምለኪያ ስፍራ በመቀየር የግለሰብ አራት ክፍሎችን በመከራየት ሳሎንና መኝታ ክፍል የነበሩ ሁለት ክፍሎች በመቀላቀል እንዲሁም መለስተኛ ቢሮና የልጆች አነስተኛ ክፍል እንዲኖር በማድረግ ለሁለት አመታት አገልግሎቷን ማስቀጠል ችላለች፡፡ በዚህ ጊዜ የአካባቢው ክርስቲያን ማህበረሰብ ለቤተክርስቲያኒቱ ትኩረቶችና ያላሰለስ ጥረቶች እውቅና በመስጠቱ ከመደበኛው ጉባኤ በተጨማሪ የልጆችና የታዳጊዎች ቁጥር ከአጥቢያዋ አቅም በላይ እየሆነ መጣ። ስለዚህም የአጥቢያዋ የማምለኪያ ስፍራ የሆነውን ሙሉ ግቢ በመከራየት ካላለፉት ስድስት አመታት ጀምሮ አገልግሎቷን እየሰጠች ትገኛለች። የልጆች እና የታዳጊዎችም ቁጥር በየጊዜው እጨመረ በመሄዱ እና የአባላት ቁጥር በመብዛቱ ይህም ስፍራ እየጠበበ መጣ። በመሆኑም በነሐሴ 8, 2011 ዓ.ም ለልጆችና ለታዲዎች የብቻቸው ግቢ በመከራየት “ሎይድ የልጆች እና የአዳጊዎች የመጽሐፍ ቅዱስ ማዕከል” የሚል ስያሜ በመስጠት በተስፋፋና በተደራጀ ሁኔታ አገልግሎት መስጠቷን ቀጠለች።
በ2006 ዓ.ም. በኮንደሚንየም ቤት ውስጥ ከተገናኙ ሁለት ቤተሰቦች ጀምሮ እስከ በመቶዎች የሚቈጠር ጉባኤ።
በዚህ ክፍል
“የተለወጠና ኹለንተናዊ አርአያነት ያለው የጽድቅ ተጽእኖ ፈጣሪ የክርስቶስ ማኅበረ ሰብን ማየት”
ሰባቱ የራእይ ምሰሶዎች
መለወጥ [Conversion] አንድ ሰው ኀጢአተኛ መኾኑን አምኖ በመቀበል (ሮሜ 3፥23)፣ በኢየሱስ ክርስቶስ የእግዚአብሔር ልጅነትና የኀጢአት መሥዋዕትነት በማመን (ሮሜ 10፥9)፣ ንስሓ በመግባት፣ ማለትም ከኀጢአታዊ መንገዱ በመመለስ (ሐዋርያት ሥራ 3፥19)፣ በመንፈስ ቅዱስ ርዳታ ዳግመኛ በመወለድ (ዮሐንስ 3፥3-8) ከእግዚአብሔር ጋራ የሚጀምረውን ዐዲስ ሕይወት (2ቆሮንቶስ 5፥17) የሚያመለክት ነው። ይህ ልውጠት የአንድ ወቅት ቅጽበታዊ ኹነት ወይም ውሳኔ ሳይኾን ለዕድሜ ልክ ኢየሱስን የመከተል ውሳኔ ነው (ሉቃስ 9፥23)።
የሰው ሕይወት ኹለንተና የምንላቸው ሰባት ነገሮች ናቸው። እነርሱም፦ መንፈሳዊ፣ አካላዊ፣ አእምሯዊ፣ ስሜታዊ፣ ማኅበራዊ፣ ሥነ ልቡናዊ እና ኢኮኖሚያዊ ሲኾኑ እያንዳንዱ አማኝ ኹለንተናዊ በኾነ መልኩ እያደገ መኾኑን የሚያመላክቱን መመዘኛዎች ናቸው። እያንዳንዱን አማኝ በእነዚህ አቅጣጫዎች ማሳደግ የአጥቢያ ቤተ ክርስቲያናችን ኀላፊነት መኾኑን በጽኑ እናምናለን።
አርአያነት፦ ቀዳሚነት፣ ምሳሌነት፣ የብርሃንና የጨውነት ሕይወት ሲኾን አማኝ እንደ ግለ ሰብእ፣ እንደ ቤተ ሰብእ፣ እንደ ማኅበረ ሰብእ በኹሉም የሕይወት አቅጣጫዎች ክርስቲያናዊ አኗኗሩን በመግለጥ አርአያነቱን ማሳየት አለበት።
ጽድቅ በክርስቶስ ኢየሱስ የማዳን ሥራ ብቻ በማመን በዳግም ልደት የሚገኝ የብርሃን ሕይወት ነው። ቤተ ክርስቲያናችንም፣ ከክርስቶስ በተሰጣት ኀይልና ሥልጣን አማካይነት፣ አማኞች በማኅበረ ሰቡ መካከል የጽድቅን ተጽዕኖ የሚፈጥሩ እንዲኾኑ የማስታጠቅ ኀላፊነት እንዳለባት በጽኑ ታምናለች። ይህም የየዕለት ተግባሯ እንደ ኾነ በማመን፣ በሙሉ በትጋት ትሠራላች።
የቤተ ክርስቲያን መነሻዋ፣ ማንነቷ፣ ህልውናዋና የምታከናውናቸው ተግባራት መሠረታቸው ክርስቶስ ነው። የሚገኘውም ኹሉ ከዘላለም እስከ ዘላለም በርሱና ለርሱ ክብር ነው።
ማኅበረ ሰብ የራሱ ዕሴት፣ ተልእኮ፣ ባህልና አኗኗር ያለው የሕዝብ ስብስብ ነው። ቤተ ክርስቲያንም የእግዚአብሔርን በጎ ሥራ ለማወጅ እና እንደ ካህናት ለማገልገል ከዓለም የተለዩና የተጠሩ አማኞች ስብስብ ነች። ይህ ማኅበረ ሰብ የተለዩ ሰማያዊ ዕሴቶች እንዳሉት ማኅበረ ሰብ፣ ሊያሰተሳስሩን በሚችሉ መንፈሳዊ፣ ባህላዊ፣ ኢኮኖሚያዊ እና በሌሎችም ጉዳዮች ላይ በትኩረት በመሥራት የክርስቶስን ማኅበረ ሰብ መገንባት በጽኑ የምናምንበት የየዕለት ተግባራችን ነው።
ቤተ ክርስቲያን ከእግዚአብሔር የተቀበለችው ይህን ታላቅ ራእይ በአምላክ ረድኤት እንደሚፈጸም በጽኑ እናምናለን። ይኹን እንጂ በእምነት ያየነው እንዲፈጸም ስልታዊ ዕቅዶችን በመንደፍ፣ በጊዜ የተከፋፈሉ ግቦችን በማስቀመጥና ለድርድር የማይቀርቡ ቋሚ የየዕለት ተግባራትን እና መፈጸሚያ ስልቶችን በመለየት በሙሉ ትጋት እና መሰጠት መሥራት እንዳለብን በማመን እንሠራለን።
ዋና መጋቢ
ከቤተ ክርስቲያኒቱ ምሥረታ ጀምሮ
መጋቢ ዘሪሁን ኃይለሚካኤል ከባለቤታቸው ወ/ሮ መቅደስ ኃይለመስቀል ጋር በመሆን፣ በአዲስ አበባ አማኑኤል ኅብረት ቤተ ክርስቲያን አማካኝነት የተሰጣቸውን ተልዕኮ በመቀበል ከገርጂ አማኑኤል ኅብረት ቤተ ክርስቲያንን የምስረታ ጊዜ አንስቶ እስካሁን ድረስ በዋና መጋቢነት ቤተክርስቲያኒቱን እየመሩና እያገለገሉ ይገኛሉ።
በጌታ ረድኤት ባለፉት 25 እና ከዚያ በላይ ዓመታት በቤተ ክርስቲያን አመራር፣ በመጋቢያዊ እንክብካቤና በቃል ትምህርት ቅዱሳንን እያገለገሉ የቆዩ ሲሆን፤ ካለፉት ከ18 አመታት ጀምሮ ጌታ በሰጣቸው እድል ከኢትዮጵያ ውጪ በሚገኙ የተለያዩ የአለማችን ሃገራት ኢትዮጵያውያንን እና ኤርትራዊያንን በማገልገል ላይ ናቸው።
ከአጥቢያ ቤተ ክርስቲያን አገልግሎት ባሻገር፣ በኢትዮጵያ ወንጌላውያን አብያተ ክርስቲያናት ኅብረት በዞን አመራርነት ያገለገሉ ሲሆን፤ በአሁኑ ወቅት ደግሞ በአዲስ አበባ ክልል የቦርድ አባል በመሆን አብያተ ክርስቲያናትን በታማኝነት እያገለገሉ ይገኛሉ።
በገርጂ ዐማኑኤል እንኳን በደህና መጡ — እንዳሉ ይምጡ፣ በክርስቶስ ባለው ሕይወትም አብረውን ያድጉ።
